Govèrn e futur

Gran leçon se despren d'ua bona frasa de Joaquim Nadal, en transcurs deth debat d'investidura d'Artur Mas coma president dera Generalitat: "El Grup Parlamentari Socialista vol ser més alternativa que oposició". Efectivament, mès important qu'er exercici dera oposicion ei saber articular ua alternativa seriosa de govèrn. Aguesta a estat ua des claus der èxit deth sindic Francés Boya entà guanhar es darrères eleccions ath Conselh Generau: saber bastir alternativa. Per contra, semble qu'era oposicion aranesa, immèrsa ena critica pera critica, non ei en condicions d'aufrir un projècte minimament credible entath país, coma rebrembe aué eth conselhèr Juan Antonio Serrano, en un article d'opinion.

Es principis de "umilitat, responsabilitat e esperança" qu'a sabut plantejar, en quauqua ocasion, eth pròplèu president catalan non son pas exclusius d'un partit e, mès lèu, en Aran les encarnen aué eth Govèrn d'Unitat d'Aran deth sindic Boya: un govèrn solid, damb projècte de país e ath costat dera gent, perque sap escotar es palpitacions dera nòsta societat, en tot assetiar es bases d'ua naua realitat economica e eth besonh de projectar-la en forma de futur compartit entre era màger part possible de persones, mès enlà des opcions ideologiques personaus, perque ei conscient qu'era soma mos hè mès fòrts.