E era setmana ei lèu passada... e, totun, s'an succedit ahèrs plan importants entà Aran. De prumèr, ei fòrça destacable qu'eth Proòm dera Val d'Aran, era figura qu'eth Sindic de Grèuges adòpte en Aran d'acòrd damb eth convèni ath quau s'arribèc en 2009 damb eth Conselh Generau, age començat a estudiar era possibilitat qu'era lei de vegueries, atau coma ei plantejada en aguesti moments, non resòl com cau er encastre d'Aran coma "entitat territoriau laguens de Catalonha", segontes mane er Estatut. Pro que se n'a encuedat de denoncia'c eth sindic enes darrèri mesi.
Era actuacion deth Proòm, possada pera encomana deth Conselh entà susvelhar es drets d'Aran, era persisténcia deth madeish sindic Boya e era volentat explicita deth pòble aranés obliguen ath Parlament a reconsiderar er ahèr e, a despièch dera impossibilitat immediata d'aplicar era lei, dar compliment a çò qu'Aran se merite. Demoram auer bones notícies ad aguest respècte, coma de bones en seràn lèu respècte dera naua lei d'Aran, pr'amor qu'era negociacion damb era cramba catalana, especiaument damb es nòsti aliats en Parlament, non s'a arturat pas ací. E cau díder, en aunor ara vertat, que venguem de trobar plan bona predisposicion.
Bona predisposicion... coma era qu'an demostrat auer es trenta entitats, organismes, associacions, institucions e partits qu'an acordat e dat eth sòn visteplatz finau ath manifèst pera lengua pròpria d'Aran entà que lo prengue en consideracion eth Parlament ara ora d'abordar era lei der occitan, aranés en Aran, era prumèra lei d'aguestes caracteristiques que prebotge eth Govèrn dera Generalitat en trenta ans. Qu'ei merit de toti, sustot des qu'an hèt possible era perviuença dera lengua en carrèr, en casa, enes institucions, ena escòla. Domatge que Convergéncia non l'age volut signar, fin finau. Demorem qu'eth consens, ath marge des diferéncies, pogue èster pro ampli entà arténher ua lei plan vitau entath futur der aranés.
Cap comentari:
Publica un comentari a l'entrada