Era partidizacion ja ei ací

En aguest país, i a dues manères de hèr politica: era des que cerquen er acòrd e eth consens, e era des que sonque suenhen per interès partidista immediat. Eth Sindic a dat pro mòstres de dialòg, unitat e tanben fermesa damb es fòrces politiques representades en Conselh Generau d'Aran, enes ahèrs mès transcendentaus tath país. N'auem parlat pro aguesti dies, en referéncia ara defensa der Estatut e ara demana entà excludir Aran dera vegueria deth Pirenèu, en contra deth plantejament der auantprojècte de lei d'organizacion vegueriau.

Mès, tot just londeman de pactar ua declaracion conjunta damb eth grop de Convergéncia ena defensa des objectius adès nomentadi, tot just londeman, eth secretari generau, Álex Moga, escriu un irat article en contra deth tripartit tot lançant insidioses acusacions de sospitoses justificacions des sòus que perceben eth sindic Boya e eth director dera Oficina entar Occitan en Catalunya, Jusèp Loís Sans. Era critica ei plan legitima laguens deth debat politic. Entre laguens deth jòc democratic. Ara ben, ¿ère de besonh aguesta utilizacion partidista en uns moments en qué eth principau objectiu ère era recerca dera unitat e eth consens? Eth secretari generau de CDA non s'a caracterizat, precisament, per auer eth dò dera oportunitat.

Er alcalde de Vielha, Pau Perdices, a responut ara crida deth sindic d'Aran entà qu'es ajuntaments se higen ara defensa der autogovèrn aranés, e, mancat de protagonisme mediatic, a profitat era amassada entà, non vos ac perdatz, criticar era "pòga ambicion" deth Sindic en aguest ahèr. ¿Li semble pòga, londeman qu'Unitat d'Aran, deth quau Francés Boya n'ei eth sòn secretari generau, age menaçat ath PSC de trencar eth pacte politic, s'es socialistes acaben aprovant era lei de vegueries, enes actuaus tèrmes? A qui sage de préner eth peu er alcalde de Vielha? ¿Non serà que li dò que justament eth Sindic age agut eth coratge, que d'auti non an, en dar un còp de fòrça ena defensa des drets politics dera Val d'Aran?

Çò que mès lamenti d'aguesta situacion tan incomòda ei era pèrta d'unitat que pòt suposar era actitud irresponsabla e desleiau der alcalde e deth secretari generau de CDA. Èm pògui e, ath dessús, mos discotim en quaquarren en qué mos calerie èster mès amassa que jamès. Semble, ath delà, que a quauqu'un li shautarie que gessesse entà dauant aguesta lei de vegueries, se non, non s'enten. Eth president d'UA, Arturo Calbetó, qu'ager protagonizèc era jornada damb era sua menaça contra eth PSC, ja avertic, en acte de commemoracion deth Conselh Generau Provisionau, que "era division intèrna a estat era desencusa entà retardar era consolidacion der autogovèrn". Non aprenem dera experiéncia dempús de trenta ans, donques n'er alcalde de Vielha n'eth secretari generau de CDA se'n vòlen dar per alludidi.