Era democràcia representativa a trobat, un còp mès, era mès nobla expression enes darrères eleccions ath Parlament que venguem de celebrar. A aumentat era participacion, e CiU, ara quau felicitam, a guanhat de forma clara e contundent, ath temps qu'eth PSC a estat derrotat de forma autant de clara e contundent.
CiU a sabut imposar eth sòn relat e estiéner era idèa que Catalonha a de besonh un cambi de cicle. E es ciutadans l'an avalat. Eth PSC, per contra, a estat victima deth tapatge deth Tripartit e, sustot, ua crisi economica brutau que desestabilize en aguesti moments toti es govèrns europèus.
Era Val d'Aran non ei alièna ad aguesta situacion e tanben ací a guanhat CiU, a despièch qu'eth PSC a suportat mielhor, damb un 25 % de supòrt (18 % en Catalonha), era derròta qu'a patit en ensem deth territòri catalan. E se non m'enganhi, des tres municipis dera província a on eth PSC a guanhat, dus son aranesi (Bossòst e Canejan). Mès açò non pòt èster un consòl. Eth càstig a estat inapellable.
A CiU li tòque governar e, coma a dit eth President Montilla, as naui governants cau desirar-les tota sòrta d'encèrts entà gésser amassa dera crisi. Es socialistes auràn d'exercir ua oposicion responsabla e collaboradora, e entre toti mos calerà seguir trabalhant entà guanhar eth futur que meriten es ciutadans. Ei enes nòstes mans.
Cap comentari:
Publica un comentari a l'entrada