Sang naua

Tot soent se parle deth besonh d'incorporar "saba naua" coma forma de renauiment d'un projècte, d'ua institucion, d'un partit, d'ua associacion. Ager podíem liéger enes diaris era expression "sang naua", en madeish sens, dilhèu coma forma mès viua e illustrativa. Tant era ua coma era auta, córrer que córrer pes sòns conductes, son vida que cor. E de viatges, fòrça viatges, ei sang que cau, e de vertat, tan arròia e ludenta que mos hè a virar eth cap. Era associacion de Donants de Sang dera Val d'Aran a organizat ua caminada pes carrèrs de Vielha (10 d'abriu, entàs 17.00 h, ena plaça dera Glèisa) damb motiu deth dia mondiau deth Donant de Sang, que se celèbre enguan en Barcelona. Vides que corren pera sang naua que tanti an de besonh. Sang naua que se balhe en un gèst senzilh e tan precís coma era agulha que tot just que punche. Mès non ei sonque sang que se da, son es nòsti talents per guarir e suenhar (e suenhar-mos) e portar ua vida mielhor, mès confortabla. Sang naua que mos dam, alavetz eth dia 12 d'abriu, en palai d'Espòrts (d'11.30 h a 21.00 h).