Dera valentia ar electoralisme

Eth sindic Francés Boya s'a abstengut en debat sus es esmendes ara totalitat presentades pera oposicion de CiU, PP e Ciutadans ara lei de vegueries. Un gèst valent, que dèishe en ridicul ara oposicion aranesa, qu'auie lançat atacs preventius contra eth clar posicionament deth Sindic. Aguesta abstencion s'a d'interpretar en aguesti sentits:

1. Coma ei sabut per toti, eth Sindic non compartís er actuau redactat dera lei en çò que tanh ara Val d'Aran, mès era sua volentat ei dar un marge de confidança ara negociacion en tràmit parlamentari entà mielhorar er apartat que hè referéncia a Aran e, per tant, excludir era Val dera vegueria deth Pirenèu, d'acòrd damb era legislacion vigenta en matèria de cooperacion locau.

2. D'aguest punt, se derive eth reconeishement deth dret de Catalunya a organizar-se en vegueries, coma establís er Estatut, mès en tot respectar era volentat deth pòble aranés. Cau tier en compde qu'aué sonque se debatie era admission des esmendes qu'afècten ara totalitat deth tèxte. Per tant, ei eth prumèr pas d'un procès que permeterà eth debat e era possibilitat d'acòrds.

3. Tanben cau méter en evidéncia era manca de credibilitat de CiU. Era federacion nacionalista s'opòse ara lei peth simple hèt que "non ei prioritària dauant dera crisi", ua excusa plan banau que sage d'esvitar es sues responsabilitats, perque s'eth Parlament se regisse per aguest rasonament sonque poderien tramitar-se es leis d'estímul dera economia.

4. Mès arren sabem de ce qué pense CiU respècte d'Aran en nau mapa vegueriau. ¿Apòste o non per integrar a Aran ena vegueria deth Pirenèu? ¿Ei aguesta era sua propòsta presentant de candidat per Lleida ar alcalde de la Seu d'Urgell, un clar defensor dera vegueria damb Aran includit?

Aguestes son es preguntes que mos auram de hèr enes pròplèu setmanes, dauant dera capacitat plan demostrada deth Sindic e Unitat d'Aran entà deféner es drets d'Aran, perque era rèsta des gesticulacions que se sajaràn d'interpretar mos crearàn eth dubte rasoable de qu'ací quauqu'uns sonque saben jogar ar oportunisme mès fàcil, ara demora de trèir-ne un profit electorau.