1. Diada. Aran a prenut especiau protagonisme ena Diada der Onze de Seteme, atau coma a remercat era premsa provinciau pendent aguesta dimenjada. Eth sindic d'Aran, Francés Boya, a estat er encargat de hèr eth pregon dera hèsta de Catalonha en acte deth Rosèr organizat per Ajuntament de Lleida. En eth, Boya a reivindicat eth "valor incalculable" der occitan, qu'era "Espanha dialoganta e era Catalonha dubèrta" a de saber preservar entath ben dera umanitat. Ath delà, a instat a estacar es vincles d'Aran damb Lleida "en ua naua singladura", a on "era plana e era montanha se dan era man".
Lleida represente era Catalonha propèra que mos apòrte as aranesi servicis e projèctes tan relevants coma era Universitat, es atencions e especialitats d'un espitau coma er Arnau de Vilanova o eth madeish Parc de Gardeny damb era dubertura d'ua delegacion en Aran. Sense desnaturalizar totun eth marc d'autogovèrn, era singularitat d'un pòble pòt conjugar-se damb era sua apiertença a un territòri comun e ampli damb referents clars, de pes, coma eth que sonque pòt representar entà Aran era ciutat de Lleida, en sòn encastre mès propèr.
2. Arenys de Munt. En aguest pòble deth Maresme, s'a expressat aué ua Catalonha que diferís damb pro evidéncia dera Catalonha dubèrta e dialoganta qu'Aran demane. Es deliris d'uns e auti, separatistes e separadors, s'an trobat ena vila damb motiu d'ua consulta grotèsca, convocada per ua associacion damb era complicitat der Ajuntament entà demanar as ciutadans deth pòble pera independéncia de Catalonha. Damb quina legitimitat? Non ac sabem, mès òc qu'auem ententut fòrça era paraula democràcia, coma se d'ua assemblada o comunautat de vesins se tractèsse, coma se non compdèssen dejà n'es procediments n'eth mès elementau respècte as règles deth jòc. Eth problèma d'aguesti deliris non ei tan es volentats de secession o unicitat, coma era enorme capacitat entà dividir e crispar ua societat de forma inutila e gratuïta.
4 comentaris:
Veni de liéger era web dera Falange, entà saber qué les empenhie a protestar tan energicament en ua consulta populara ena que sonque se demane ara gent era sua opinion.
Dempús d'auer liejut çò que ditz http://www.falange.es/index.php?option=com_content&task=view&id=581&Itemid=2
è liejut eth tòn blòc e è trobat exactament es madeishi arguments exprimidi en occitan.
Era legitimitat mès democratica que i a, ei era deth pòble. Se guardam era participacion, aué a estat fòrça mès nauta qu'en quin aute comici que i age agut en Arenys de Munt, maugrat convocaue ua entitat civica pr'amor qu'era Falange e er Estat (es dus qu'an denonciat as tribunaus er acte) an empedit qu'ac hesse er Ajuntament.
Non hè guaire, se hec ua auta consulta en Arenys entà saber s'eth pòble volie o non pavimentar era riera e arrés non se queishèc. B'ei clar que çò que vos argaròte ei era qüestion prepausada.
Per cèrt, Arenys de Munt a actuat exactament damb era madeisha legitimitat qu'ac hec eth pòble aranés en sègle XII e que resultèc en privilègi dera Querimònia.
Tant enes tempsi en qu'es aranesi artenhèren era Querimònia coma ena epòca actuau, era democracia participativa va fòrça mès tà delà qu'era democracia representativa que defenses.
Cau anar mès tà delà dera democracia representativa. Cau activar era democracia participativa. Qu'ei atau coma ath long dera istòria era umanitat a artenhut es libertats. Açò ei era mia opinion. Te demani excuses pera intromission, sonque sagi d'enriquir eth debat.
Amic Farri, pensi que consultes coma era d'Arenys de Munt da ales as falanges e toti es antidemocratics. Ère de besonh de "demanar" a uns vesins en forma de referèndum sus un ahèr qu'afècte ath conjunt d'un pòble? Semble mès ua provocacion que non pas un liure exercici democratic.
Per cèrt, er Aran deth sègle XIV venguie de patir diuèrses ocupacions militares. Era Catalonha actuau demore fortunosament en un Estat democratic.
Amic Amador,
Veigui que vedem es causes de manèra diferenta, çò qu'apoiridie generar un debat frunctifèr pr'amor qu damb er escambi de punts d'enguarda, enriquim eth nòste pensament e eth nòste saber. Aguesta ei, tà jo, era tòca principau des blògs.
Segons era mia manèra de veir es causes, que hèsqui era següenta lectura des hèts d'Arenys de Munt. Considèri qu'er estat espanhòu ei encara fòrça mancat de valors democratics: era extrèma quèrra violenta ei illegau mès era ultradrèta damb es mans plees de sang e/o eretièra deth franquisme se presente a eleccions e a dret a manifestar-se damb impunitat.
Totun, çò qu'a desvelhat qu'Arenys òpte entara democracia participativa, creigui qu'ei eth hèt qu'un tribunau (eth TC), pogue decidir per dessús dera volontat d'un pòble (eth referendum sus er Estatut de Catalonha).
Sigue çò que sigue çò qu'ac aurà provocat, ei evident qu'era alternatiua ara democracia representativa a estat era democracia participativa. E en aguest hèt creigui qu'as politics vos calerie soscar, pr'amor qu'era participacion ara consulta populara a estat mès nauta qu'enes darrèri comicis legaus que i a agut en municipi.
Ath delà d'açò, que cau compdar qu'aguest còp sonque i auie un solet lòc a on votar, quan normaument i a diuèrsi collègis electoraus, e es abitants an arrecebut cartes de grops de totes es colors en tot animar-les a non participar-i.
Hè temps qu'era classa politica ei preocupada pera nauta abstencion. Ua participacion de 41% en aguestes condicions, en ua consulta populara, supère es auti comicis.
Entà acabar, e coma defensor dera democracia participativa, que voleria felicitar es 61 persones qu'anèren tà votar que NON ad aquera consulta. Toti aguesti 61 mos an dat ua leçon de democracia. Aguest ei eth mèn punt d'enguarda. Demani desencuses pera intromission e t'arregraïsqui eth debat.
Publica un comentari a l'entrada