Quan un politic persute damb es sues obsessions, era parròquia ges lèu ena sua defensa en tot alegar qu'ei un politic de conviccions pregones. Era dusau part deth Plan Ibarretxe ei frut deth paradigma deth politic testut incapable de pactar ne de hèr autocritica, que sage de tirar entà dauant damb es vielhi parametres qu'an devengut un error e un problèma mès qu'era solucion que ditz aportar. Non, senhors. Eth lehendakari Ibarretxe poderà èster un òme de conviccions, mès ei un irresponsable e un imprudent. Un governant non pòt adoptar ua actitud tan parciau ne mesures tan extrèmes. Eth sòn prètzhèt se base en includir, en amassar a despièch des diferéncies. E damb mès motiu e incidéncia quan era violéncia criminau acace per rasons politiques. Ei basic mantier uns minims de consens en ua societat entà esvitar fragmentacions irreparables.Eth sòn referèndum a tanben reverberacions enes nòstes contrades damb uedes prepauses de "dret a decidir", mès qué ei era politica se non un constant decidir? Non decidís eth pòble quan vòte?... E, de moment, es opcions sobiranistes an eth supòrt popular que an, maugrat que cèrta opinion publicada, damb era complicitat inestimabla des mejans publics catalans, mos vò hèr creir qu'èm en paradís nacionalista.
A despièch des moments descarnadi dera nòsta politica, en Aran gaudim d'uns consensi basics entre es dus grani partits ena defensa dera singularitat d'Aran, deth sòn autogovèrn e institucions, damb era volentat d'includir e de respectar es normes e ara majoria de ciutadans. En aguest sens, era via aranesa ei illustrada peth clima d'enteniment entre es representants des grops politics deth Conselh Generau d'Aran ena prumèra amassada mixta entà reformar o elaborar era naua Lei d'Aran, en especiau pera bona sintonia entre eth sindic Francés Boya e eth cap dera oposicion, Carlos Barrera. Un bon començament entà ua lei, era norma que regule eth nòste autogovèrn, qu'ei de besonh que s'artenhe damb eth consens des principaus partits d'Aran. Arren a veir damb era via Ibarretxe...
2 comentaris:
Estimat Amador, ena mia opinion, díder qu'era gent decidís damb eth sòn vòt ei un shinhau excessiu. Damb eth vòt solament pòdes sajar de trèir çò que t'aurà pogut semblar un mau govèrn o en quinsevolh cas votar ath mau menor (o non demanaue açò ZP ena darrèra campanha electorau?).
Per aute costat, dempús deth vòt, e pendent tota era legislatura, eth ciutadan ja non decidís absoludaments arren, e pòques vies à entà hèr a saber era sua opinion sus era gestion e accions deth govèrn. De hèt, çò qu'era gent ei en tot decidir ei dar era esquia a un sistèma politic e a uns politics damb es que non se senten ne representadi ne ben gestionadi, e as que non i a manèra de retrèir arren enquias pròplèus elleccions. Açò, aparentaments, non à cap repercusion ne provòque cap reflexion seriosa. E en darrèr lòc, Amador, non sò gran coneishedora dera politica deth País Basc, mès òc que me pregunti coma ei possible que damb un territòri tant conflictiu jamès non s'age volut consultar era opinion dera gent. As politics les cau resòlver un problèma prigondament arraïtzat, non ac pòden hèr d'esquia ara poblacion basca e ath marge deth que pensen. Non se pòt illegalizar ua opinion, se li a de dar ua via politica entà desarmar era opcion dera violéncia. Jo diderie qu'era linha d'aguest govèrn e de toti es anteriors ei era contrària.
E fin finau, s'era gent non a votz, e era sua opcion politica s'illegalize, apiejarà es caps que tròbe. Açò òc qu'ei ua imprudéncia!
Personaument, non sòi cap a favor deus referéndums sus quinsevol tèma. Mès sus quauques subjèctes, òc, pensi que poden èster salutaris. E aqueth n'ei un. A vegadas, ua clarificacion s'impausa e lo referéndum ei la melhor manièra d'obtiéner ua responsa clara e indiscutibla. De qué avem póur, exactament?
Publica un comentari a l'entrada