Bastir país

M'agrade eth nau estil qu'eth PSC a introdusit ena politica catalana, en tot prebotjar era sana confrontacion d'idèes e projèctes e non pas des persones. Un exemple entara rèsta de fòrces politiques. Un exemple tanben entath debat politic en Aran. Coma dejà hec Unitat d'Aran en 2007, eth PSC incorpòre cares naues en equip de campanha deth president Montilla, qu'acabe de dar a conéisher eth sòn compromís en un discurs personau e emotiu en Pinós (Solsonés), en centre geografic e, simbolicament, en centre politic. Totun, tant eth PSC en Catalunya coma UA en Aran representen era centralitat e era opcion de progrès e de justícia sociau. Dauant era prepoténcia abituau, cau ua politica mès onèsta, mès respectuosa e mès apròp des besonhs reaus des persones. Eth govèrn dera Generalitat a protagonizat ua ingent activitat dera quau en podem da fe en parçans coma era Val. Per exemple, es nòsti municipis, ath marge de colors politics, an podut amiar entà dauant fòrça actuacions gràcies as ajudes dera Generalitat. Un govèrn que, en collaboracion damb eth Conselh Generau, e dempús d'ans de fausses promeses, s'a metut a trabalhar entà hèr possible realitats coma era reforma der Institut d'Aran, era promocion de viuendes sociaus, era mielhora dera C - 28 o era ampliacion der Espitau. Ac podetz consultar en nau portau web qu'a presentat aué eth Conselh Executiu. S'apère Construïm Catalunya.