De leis

1. Lleida non pare. Ciutat damb ambicion e capacitat de bones iniciatives entà garantir eth sòn progrès e er equilibri deth territòri. Ager inaugurèc era Llotja damb era representacion de Il Trovatore, e ac podec hèr perque compde damb ua societat civila fòrta, atau coma soslinhèc er alcalde Àngel Ros. Felicitats e que la pogam gaudir tanben es aranesi.

2. Voleria recomanar tanben era lectura d'ua carta publicada ager en El Periódico qu'a escrit era cap de Cultura e Politica Lingüistica, Maria Vergés, en respòsta ath lingüista Albert Branchadell, qu'en un aute article deishaue ena ombra deth dubte eth modèl d'immersion lingüistica dera escòla aranesa, ara qu'era Lei der Aranés entrarà en Parlament entà garantir justament qu'er aranés sigue lengua veïculara e d'aprenedisatge dera nòsta escòla en un contèxte de multilingüisme enriquidor.

3. Parlant de leis que mos afècten... Era reforma dera Lei d'Aran seguís eth procès pactat entà que la pogue dar lum vèrda eth Govèrn dera Generalitat d'acòrd damb era propòsta des partits aranesi. Eth procès non seguís dilhèu eth ritme optim. Ara ben, ei preferible aprovar tard ua bona lei, qu'aprovar-ne ua de dolenta damb prèsses e sense pacte.

E ad açò darrèr jògue Convergéncia (CDA), qu'a agut ua illuminacion estrambotica e a decidit convocar unilateraument un plen extraordinari entà demanar qu'era lei se tramite coma ua iniciativa legislativa comarcau, talament coma acabe de hèr era Cerdanya, ei a díder, sense er acòrd dera Generalitat, qu'ei era qui acabe garantint es recorsi de besonh tath desplegament der autogovèrn. O sigue, que CDA, que confon Aran damb era Cerdanya e bloquegèc era prumèra Lei d'Aran pendent dètz ans, trenque eth consens per ua iniciativa electoralista que sonque cerque era confrontacion politica.