Quan tot just venguíem de dar era benvenguda ath bon umor expressat ena paròdia "polonesa" deth sindic d'Aran en TV3, ara mos cau regretar eth pèssim monològ qu'un suposat especialiste der umor mos acabe de lançar as aranesi en forma de macabra ofensa, ena Barcelona Television. Era ironia e eth sarcasme son un estil, que, de cap forma, a sabut resòlver aguest personatge. Coma diden en casa, guarda (oeita!), que ne hèn de pegaries tà guanhar-se eth pan (ena television)!
Mès era perplexitat non s'acabe ací, quan, ja de punh e letra, quan es arguments son mès pensadi, a despièch que de viatges ei tot un díder laugèr, descurbisqui tanben er opròbi vomegat en forma d'article d'opinion contra era Val d'Aran peth sòn, ai!, espanholisme irredemp. Ja ei ben vertat qu'era ignorància ei atrevida...
Eth "valent" dera denóncia s'apère Víctor Alexandre. Semblarie que forme part d'aqueth grop de gent comprometuda ("els millors"?) qu'an renegat deth "tripartit", perque, de forma latenta, son incapables de digerir er hèt qu'eth president dera sua Catalunya imaginària se hèsque a díder "José" e non pas Josep, coma mane era sua religion. Per aguest motiu, un des arguments de nauta volada intellectuau que hè a servir eth tipe entà demostrar er "espanholisme" deth Sindic ei que se hè a díder "Paco", perque "sona més espanyol". En fin, cada persona país coma li tolère eth còs.
O sigue que ja vedetz que quan eth nacionalisme uniformista indigèste trè a passejar es sòns dimonis. Era pauta de comportament ei era madeisha, ací, en Barcelona, en Madrid o ena China populara, que didie er aute. Qui non profèsse era fe "nacionalista", d'aguest nacionalisme uniformista, ei tot seguit anatemizat pes sòns profètes. Aran s'a atrevit a lheuar era votz, pròpria, dispariona, atau coma ei eth sòn pòble, e es intolerants de tostemp li meten eth dit en uelh. Tanplan qu'en diden de pegaries tà guanhar-se eth pan!
Cap comentari:
Publica un comentari a l'entrada