Allegacions

Deishèrem er an damb era polemica vegueriau e encetam eth 2010 damb er ahèr encara borint. Totun, eth posicionament deth Departament de Governacion s'ei modulat e eth conselhèr reconeish eth besonh de blindar er autogovèrn aranés en marc dera naua organizacion territoriau. Mès, encara demore camin e s'an de veir es prepauses per escrit. De moment, eth Govèrn dera Generalitat a escotat ath territòri en tot postposar era aprobacion dera norma, e eth Govèrn qu'entèste eth sindic Francés Boya, eth prumèr en lheuar era veu en Catalonha contra aguesta lei eth passat dia 11 de deseme, a hèt es deuers en tot presentar es allegacions corresponentes, que podetz liéger ara seguida, en base ath comunicat de premsa deth Conselh Generau sus aguest ahèr:

ETH CONSELH PRESENTE ALLEGACIONS ENTÀ EXCLUDIR ARAN DES VEGUERIES

Eth Govèrn deth Conselh Generau d’Aran a presentat allegacions ar auantprojècte dera lei de vegueries entà rebutjar era inclusion d’Aran ena division vegueriau plantejada e reconéisher era Val coma ua entitat territoriau e singulara laguens de Catalonha. Eth sindic d’Aran, Francés Boya, a anociat qu’eth Conselh a presentat allegacions en tot recuélher eth sentit dera declaracion institucionau deth Plen, aprovada per unanimitat eth passat dia 22 de deseme, damb era empara der Estatut d’Autonomia de 2006, que reconeish, empare e respècte er autogovèrn e era singularitat dera Val d’Aran.

Eth Sindic a hèt referéncia a qu’eth Departament de Governacion non a compdat damb era participacion deth Conselh Generau ena elaboracion d’aguesta norma, en tot contradíder eth madeish Estatut, en sòn article 94, qu’establís que “Aran, mejançant era sua institucion representativa, a de participar ena elaboracion des iniciatives legislatives qu’afècten ath sòn règim especiau”. Entà Boya, era lei de vegueries afècte dirèctament ara autonomia dera Val, sense qu’aguesta age estat consultada ne tansevolhe s’age reflectit era sua singularitat en redactat.

Eth Conselh a proposat d’incoporar en articulat dera lei eth tèxte que seguís: “En tot atier eth sòn règim especiau e en marc des competéncies transferides ath Conselh Generau d’Aran, era Val d’Aran non poderà èster adscrita o includida en cap division territoriau que non sigue era madeisha en tant qu’aguesta division se constitusisque coma ua unitat administrativa e territoriau de descentralizacion des servicis dera Generalitat de Catalunya, en tot èster considerada era Val d’Aran coma ua entitat territoriau autonòma laguens de Catalonha”.

Istoricament, Aran jamès a demorat includida en cap division territoriau de Catalonha en tot atier eth sòn règim especiau observat enes tractats d’Emparança e dera Querimònia. Ua situacion que s’alongue enquia 1834 e que siguec recuperada e actualizada per mandat der Estatut de 1979 damb eth contengut dera Lei de 13 de junhsèga de 1990 sus eth règim especiau d’Aran e posteriorament per Estatut d’Autonomia de 2006, atau coma des Decrèts de transferéncies de competéncies, servicis e foncions dera Generalitat ath Conselh Generau.