Un govèrn de consensi

Eth Govèrn deth Conselh Generau d'Aran, entestat per Unitat d'Aran - PSC damb eth supòrt deth PRAG, ei un govèrn de consensi, atau coma acabe de demostrar aué damb er acòrd artenhut damb eth grop dera oposicion de CDA entà demanar era ampliacion deth tèrme d'exposicion publica deth Plan director urbanistic pendent un mes addicionau. Ua propòsta que s'a artenhut en tot rebaishar eth tèrme proposat per CDA (de dus mesi), qu'auesse alongat massa eth periòde entà dotar ath país d'un esturment tan de besonh entara planificacion territoriau, e esvitar eth traslat impossible der expedient deth Plan ara sedença deth Conselh Generau, a on es servicis tecnics faciliten dejà era consulta publica dera còpia deth document. Tèxte que, per cèrt, ei disponible enes Ajuntaments e era Generalitat, responsables dera tramitacion deth Plan, atenudes es competéncies urbanistiques qu'ostenten e qu'eth Conselh non a.

A despièch que, en aguest ahèr, era oposicion a sajat de confóner as ciutadans de forma irresponsabla e pòc respectuosa (de "totalitaris" s'an arribat a qualificar es govèrns deth Conselh e era Generalitat), eth procès s'a podut redreçar damb er acòrd e era sensatesa, hèt que certifique era capacitat de pacte e acòrd deth nòste Govèrn, coma s'a vist dejà damb era genèsi de projèctes nacionaus plan trascendents, coma eth dera reforma dera lei d'Aran (consensuada damb es grops deth Conselh), era futura lei der aranés (que se negòcie damb era Generalitat) o eth desvolopament d'un plan anticrisi (frut des besonhs manifestadi pes agents economics e sociaus ena Taula dera Economia), qu'aurà mobilizat de forma extraordinària 10 milions d'èuros.