Paco Boya, era veu d'Aran

Darrèr dia de campanha. Cèrtament, començam a èster cansadi. Mès a valut era pena. A valut era pena sénter-te partícep d'un projècte comun e ath temps sénter-te part d'un equip que l'a volut hèr saber ara opinion publica. Tostemp en positiu: ne ua paraula d'òdi ne un acte de jòc lort. Coma tostemp, me quedi surtot damb era qualitat umana der equip damb eth quau è trebalhat. Bèn, e damb aquera qualitat umana extralaborau mès canalha e que te reafirme en plaser de víuer per plaser... Lhèida a estat ath temps un descurbiment, tan près qu'ei e tan desconeishuda e enquia estereotipada que l'auia. È descubèrt per prumèr còp era Seu Vella. Un imponent claustre, de proporcions gegantines, m'a alendat era tremolor dera transcendéncia.

Fin finau, auem cada còp mès a tocar era possibilitat qu'eth candidat Montilla devengue eth prumèr president dera Catalonha postnacionalista e sociau, en favor deth benestar de toti es ciutadans, surtot d'aqueri que non an ua auta garantia qu'era proteccion des institucions deuant des qui sa'c pòden pagar tot. Montilla president!

Eth portau deth candidat

Cambi de trebalh. Adishatz Administracion! Immèrs de plen en politiqueo, supòsi que pendent ua temporada aurè mès descuedat eth blòg...

Ager presentèrem eth portau wèb deth candidat deth PSC des comarques de Lhèida Quim Llena. Ei ua manèra d'apropar eth representant deth territòri as sòns electors. Ath delà i a era possibilitat d'interactuar a trauèrs d'un originau apartat de pregunta-respòsta.

I podetz hèr ua uelhada.

www.joaquimllena.cat

Quin hart, eth nacionalisme!

¿Non vos agace era retorica nacionalista? Jo ja ne comenci a èster hart. Surtot ací, en Catalonha (escriui des de Barcelona), damb tot eth basart des seleccions... Ei domatge qu'en Aran tanben se volgue jogar a pensar damb era barretina metuda en cap. Non deishe veir mès enlà deth pròpri melic.

Aguesta religion, era deth nacionalisme, ei era unica que non a passat era pròva dera secularizacion. Totes ac an hèt, des des religions convencionaus enquiath fascisme e estalinisme.

Era fe ena unica nacion ei ua joata dera quau era politica se'n ressentís pro. Es causes importantes se decidissen entre esquèrra o dreta, entre era garantia der Estat de benèster o era inseguretat dera cobdícia individuau. Entre un Montilla e un Mas, per exemple.

Era alternativa: aranesisme sociau

1. Non sabem se personaument eth Síndic d'Aran e eth Govèrn que presidís an ideologia, un minim de pensament politic.

2. Auem clar qu'er equip de govèrn non se signifique precisament peth sòn istoriau d'aranesisme actiu ne tanpòc per compdar damb projècte politic.

3. CDA enarbòle ara eth drapèu deth nacionalisme mès dangerós qu'i pòt auer en ua societat democratica: eth dera exclusion.

4. Çò qu'ei piri: se propugne patrioterisme barat perqué eth Govèrn non a arren mès n'a véner coma accion de govèrn n'a deféner ideologicament. Ei era manifestacion d'ua impoténcia.

5. Dauant dera uedor d'accion e pensament des governants de CDA, era alternativa, Unitat d'Aran, sonque pòt proposar sense complèxi er ARANESISME SOCIAU, en sintonia damb era propòsta programatica deth candidat catalan José Montilla.

6. Es qui le coneishem, sabem qu'eth representant deth nòste país en Parlament de Catalonha aguesti darrèri ans, Paco Boya, a clar qu'era volentat d'afirmacion nacionau d'Aran passe pera volentat d'autogovèrn coma resultat de toti es qui integram eth país, sense exclusions.

7. Es trobades de Boya damb collectius deth país l'avalen coma digne interlocutor que hè deth dialòg eth procediment fondamentau dera sua manèra de hèr politica.

8. Per açò madeish, èm fòrça es que compartim eth sòn projècte e, per tant, demoram era sua reeleccion; e deisham mentretant qu'uns auti se pèrden ena net deth populisme mès feniant.

Declaracion particular d'un joen deth país ath Síndic d'Aran

Coma joen d'Aran, coma receptor dera "declaracion institucionau deth Síndic d'Aran ara joenessa deth país", voleria expressar publicament era mia insatisfaccion peth liurament e dedicacion dera declaracion qu'eth Síndic mos dedique damb tot er interès partidista, damb tota era confusion deliberada, damb tota era opacitat qu'ei capable de practicar presentant coma declaracion institucionau çò qu'ei pura propaganda de partit.

Coma politic toti sabem çò que pense, mès coma Síndic non pòt adreçar-se a tota era joenessa, damb tota era distincion e partidisme que sospitosament ditz rebotjar ena nomentada declaracion. Non sabem se se sent Síndic de tota era ciutadania, mès ua causa ei clara: damb aguesta declaracion eth representant deth mèn país a actuat de part, utilizant as joeni en generau e as volentaris en particular. Era declaracion confirme çò que fòrça temíem: era utilizacion partidista e electoralista des volentaris deth Tour de França.

E per qué se dirigís as joeni?

Pr'amor que cau hèr electoralisme, utilizant descardament es institucions, perqué cau deféner coma sigue es interèssi creadi peth dessús der interès generau. Patriotisme de pòcha, de vòl de garia, qu'amague es pròpries misèries.

Se sage d'encoratjar as joeni jos eth paraigua de "declaracion institucionau" entà que votem CDA, entà participar activament en projècte de CDA.

Semble coma se non volessen que nosati, es joeni, caminegam soleti, sobiranament, damb tota era automia de critèri politic. Çò que mens desiram es joeni son faussi paternalismes e mens quan aguesti provien de politics qu'an coma orison dera sua accion publica un copet ena esquia.

Tota aguesta declaracion regressiva entàs joeni ei negativa entàs institucions d'Aran, qu'an coma Síndic ua persona nautament partidista e de comportament bric exquisit, qu'utilize Aran, que mos utilize, entà bastir un projècte excludent, qu'abone e catalise er òdi contra Catalonha e Espanha entà evitar era critica as sues practiques e politiques que jamès s'an encuedat deth joen e des sues problematiques de viuenda, trebalh e estudis. Grana retorica nacionalista tà tan pòga politica de joenessa.

Repetisqui: resulten ridicules es paraules deth Síndic qu'entà desacreditar er adversari mos utilize damb un discors grandiloqüent autonomentat "patriotic", mès que respon a interèssi de partit e enquia privadi.

Es joeni, coma ciutadans, auem de besonh dera politica, mès non de politics que mos utilizen fraudulentament peth ben deth sòn interès.

Damb tot eth bon ròlho,

Amador Marqués (22 ans)

Mès dialòg e alegria

Comence a èster evident qu'en veir que pèrd supòrt sociau, eth Govèrn d'Aran ges ath pas coma pòt, sajant d'evitar eth còp. Un shinhau ara desesperada en tanti ahèrs que se le reviren ara contra. Ei fòrça grèu qu'eth Govèrn, auent es resòrts de podèr, non sigue capable de mercar era agenda tematica. Nerviosi?

Sense projècte politic, eth Govèrn e eth Síndic se mos desinflen. ¿Non auetz era impression qu'er equip governamentau cada còp ei de mès mal umor? Bèn... sei cap s'an sabut jamès ce qu'ei era ironia. Un shinhau d'alegria, òme! E mens sectarisme, qu'èm pògui e que mos auem d'enténer amassa.

Barrera ei incapable d'entenér-se damb arrés que non sigue deth sòn partit, encara que CiU l'a relegat en darrèr lòc dera lista tàs eleccions catalanes (Aran, un país?). Eth Síndic a perdut tota capacitat negociadora non sonque damb eth Govèrn catalan, perqué i son es socialistes, senon damb es pròpris collectius deth país. Ei dificil dialogar tumant coma es oelhes amorres...

Òc, manque bon ròlho... Ua abraçada!, govèrn.

Ratzinger e jo

Es paraules deth Papa qu'an drevelhat era ira de bèri musulmans s'an trèt de contèxte. Ratzinger ei un òme intellectuament solvent, damb uns modaus exquisits e un comportament elegant. Gran teòleg e admirablement espirituau. M'agrade mès aguest Ratzinger que non pas eth que hadie de prefècte tara Congregacion dera Doctrina dera Fe.

S'a excusat publicament er òme, ¿qué mès voletz d'ua Institucion arroganta ath long des sègles? Eth madeish a estat eth prumèr surprenut. Sonque volie remercar era fòrta incompatibilitat entre era religion e era violéncia. ¿Quin crèdit an es que combaten era desafortunada cita papau damb actes de violéncia?

Digue çò que digue eth Papa, tostemp se dauriran dus fronts. Eth des beats que tot sa'c empassen e eth des dubèrtament anticlericaus entàs quaus tot çò que shume a Glèisa ac cau combàter. Que n'a de causes era Glèisa que non m'agraden bric. Mès aguest còp, ò Nòste Sénher benedit!, sò damb Ratzinger.