(Nòta de premsa d'UA-PNA, a 17 d'octobre de 2008)
Unitat d’Aran – Partit Nacionalista Aranés (UA – PNA) a refortilhat aué en plen dera Deputacion de Lhèida eth sòn fèrm compromés entà qu’Aran non sigue includit en cap de division territoriau que non sigue eth madeish, atau coma a formalizat per miei der unic representant aranés ena institucion provinciau, Joan Riu. Eth deputat Riu a balhat supòrt ara Declaracion Conjunta deth 16 de seteme entà mantier Aran ath marge des vegueries, qu’eth Plen deth Conselh Generau aprovèc per unanimitat “a prepausa deth Sindic e deth grop d’Unitat d’Aran”.
Joan Riu a destacat qu’Unitat d’Aran “exprèsse atau, en toti es òrgans a on a representacion, era volentat manifèsta deth pòble aranés de respectar era autonomia d’Aran en sòn encastre territoriau especific, atau coma se despren der Estatut d’Autonomia de 2006 e dera Lei sus eth règim especiau d’Aran de 1990”. Segontes Riu, Unitat d’Aran considère que “a d’èster eth Conselh Generau d’Aran, coma principau institucion d’autogovèrn, er interlucotor dirècte qu’a de survelhar per qu’Aran reivindique es sues legitimies aspiracions territoriaus, sense cap tipe d’intermediacion ne distorsion partidista”.
Fòrça decisiva
Pr’amor d’açò, eth deputat aranés a profitat entà rebrembar qu’Unitat d’Aran ei ena Deputacion “era votz d’Aran e era fòrça decisiva que compartís projècte de govèrn damb es grops progressistes sense pèrder de vista era sua rason d’èster, qu’ei Aran e eth servici as sòns ciutadans”. “Era prioritat per Aran pòt comportar en ocasions eth dissentiment damb era majoria de progrès”, a explicat entà argumentar eth sòn vòt favorable ara mocion que balhe supòrt ara declaracion conjunta deth Conselh Generau.
Oportunisme de CiU
Dempús de deishar constància deth long procès qu’Unitat d’Aran a emprenut ena defensa des “drets nacionaus” d’ençà dera sua fondacion, Joan Riu a desacreditat era actitud politica de Convergència i Unió pr’amor deth sòn “oportunisme politic”, frut dera “incoeréncia mès flagranta” e era “sua pèrta de credibilitat ena defensa dera autonomia aranesa”. Eth deputat a rebrembat qu’Aran “auec de patir era umiliacion d’èster includit en mapa comarcau de Catalonha coma ua comarca mès, umiliacion qu’eth Govèrn de Convergéncia ena Generalitat amièc entà dauant damb era aprobacion dera Lei d’organizacion comarcau de 1987, sense cap tipe de consens e en tot violentar era identitat pròpia deth pòble aranés e era sua longa tradicion d’autogovèrn”.
D’alavetz ençà, atau coma a referit, “eth combat persistent e incansable d’Unitat d’Aran a favor des drets nacionaus durèc dètz ans damb persevància e compromés e damb un còst politic fòrça important entara nòsta formacion politica”. Pr’amor d’açò, “non mos dèishe de surpréner er hèt de qu’aqueri que pendent ans e ans diluïren Aran en mapa territoriau de Catalonha s’erigisquen ara en campeons dera defensa des drets nacionaus d’Aran”, a assegurat.
Manca de credibilitat deth PP
Joan Riu a censurat tanben era manca de volentat de Convergència entà sajar de consensuar era mocion qu’a presentat en Plen, a diferéncia dera declaracion conjunta qu’Unitat d’Aran artenhec damb era concertacion de totes es fòrces politiques deth Conselh Generau abantes dera sua aprobacion. E a avertit tanben sus era “manca de credibilitat deth PP en aguest ahèr, pr’amor qu’a recorruts en Tribunau Constitucionau es articles der Estatut que mos reconeishen coma pòble diferenciat”.
Eth deputat s’a reafirmat en qué er objectiu d’Unitat d’Aran ei “arténher era maxima autonomia possibla que mantengue e assolide era nòsta identitat coma pòble, sense desbrembar jamès que tot eth qu’a determinadi drets a coma expression dera sua dignitat era obligacion de defener-les”.
Lhèida, 17 d’octobre de 2008
(Fòto dera darrèra executiva d’UA, celebrada en Vielha eth passat dia 10 d’octobre)
